![6C6D1813-49B1-4A31-A791](https://360.scdn8.secure.raxcdn.com/ased/sites/5/2023/02/6C6D1813-49B1-4A31-A791-640x396.jpeg?18)
Gardd Eden, Stryd y apel
![](https://360.scdn8.secure.raxcdn.com/ased/sites/5/2023/02/F2984929-EC1C-4298-BA69-225x139.jpeg?0)
![6B4F5BEA-F0F3-4F6A-96AA](https://360.scdn8.secure.raxcdn.com/ased/sites/5/2023/02/6B4F5BEA-F0F3-4F6A-96AA-225x139.jpeg?12)
Gardd Wyllt, ger y Co-op
![4051842C-813F-4AA3-A3AC](https://360.scdn8.secure.raxcdn.com/ased/sites/5/2023/02/4051842C-813F-4AA3-A3AC-225x139.jpeg?10)
Yr Ardd Wyllt
Mae’r cennin pedr cyntaf wedi ymddangos yn yr Ardd Wyllt ger Co-op Penygroes. Mae’n arbennig gan mai dyma’r cennin pedr cyntaf i ymddangos ar y safle ers degawdau. Fe’i plannwyd, fel degau o rai eraill nol yn yr Hydref gan Glwb Garddio Yr Orsaf. Mae’r newid sydd wedi digwydd yn y fan hon yn ystod y flwyddyn ddiwethaf yn syfrdanol, fel y gwyr y rhai sy’n cerdded heibio yn ddyddiol. Cafwyd llwybr troed, plethwyd gwiail i wneud ffens, gosodwyd mainc i eistedd arni, lle i daflu sbwriel (efo to gwair!), a’r datblygiad diweddaraf yw pontydd cadarn i groesi’r afon. Mae rhwydwaith o lwybrau sydd wrth fodd plant, a bob bore Gwener daw plant ieuengaf ysgol Bro Lleu yma i brofi natur. Gan fod bocsys nythu ar y coed, mae’r plant wedi bod yn gosod afalau ar linyn a’u clymu ar y brigau. Mae dod yma petai ond am bum munud bob bore yn falm i’r enaid.
Rydym yn ffodus yn y pentref i gael gardd fach arall, un llai, yng nghefn Capel Calfaria, sef Gardd Eden ar Stryd y Capel. Datblygwyd hon yn go ddiweddar, ac mae planhigion mafon a choed wedi eu plannu yma. Pan ddaw y mafon, cewch ddod i’w casglu. Mae mainc yma, ac mae’n lle da i ddod a fflasg neu bicnic. Rydym yn gweithio ar wneud y lle yn fwy hwylus i’w gyrraedd.
Tasech chi’n dymuno helpu y criw garddio, maent yn cwrdd bob bore Mercher rhwng 10 a 12, fel rheol yn yr Ardd Wyllt. Cawn baned yn ystod y sesiwn hefyd. Cysylltwch a Gwenllian ar 07529 224629