gan
Guto Jones
Ymwelodd y prifardd, Meirion Macintyre Huws, â disgyblion Ysgol Rhostryfan yn ddiweddar am sesiwn greadigol o farddoni.
Bu Mei Mac yn teithio o amgylch ysgolion yr ardal yn cynnal sesiynau, a chrëwyd anthem newydd yn y gweithdy gyda Rhostryfan.
Dyma ganlyniad gwaith y disgyblion –
YSGOL FACH A CHALON FAWR
Yng nghysgod clyd Moel Tryfan
Mae ysgol hapus werdd,
A’i llond o wŷn yn prancio
A dawnsio i nodau cerdd,
Lle lliwgar, prydferth fel y wawr
Hen ysgol fach a chalon fawr,
Dros bant a bryn a thros ylli
Rhowch ysgol Rhostryfan i mi
Drwy Gymru fynyddig, a’r gwledydd di-ri
Rhowch ysgol Rhostryfan i mi
O dan ei chloch mae bwrlwm,
Dychymyg, hwyl a gwaith,
Mae’n galon i’r gymuned
A dyfodol iach i’r iaith,
Pan af i bedwar ban y byd
Mi fydd hi’n gwmni i mi o hyd,
Dros bant a bryn a thros ylli
Rhowch ysgol Rhostryfan i mi
Drwy Gymru fynyddig, a’r gwledydd di-ri
Rhowch ysgol Rhostryfan i mi.
Dyma stori grëwyd gydag Ysgol Rhostryfan ar gyfer gwefan fro newydd DyffrynNantlle360. I rannu eich stori leol chi, y cam cyntaf yw cofrestru fel ‘brodor’ yma: https://360.cymru